VÍS: Uppgjör 3. ársfjórðungs 2020 og uppfærð afkomuspá Árshlutareikningur félagsins fyrir fyrstu níu mánuði ársins 2020 var staðfestur af stjórn og forstjóra félagsins á stjórnarfundi þann 22. október 2020. Helstu niðurstöður þriðja ársfjórðungs 2020.
- Hagnaður var 1.032 m.kr. samanborið við 394 m.kr. tap á 3F 2019
- Iðgjöld voru 5.735 m.kr. samanborið við 6.085 m.kr. 3F 2019
- Fjárfestingatekjur voru 1.110 m.kr en voru neikvæðar um 237 m.kr. á sama tímabili í fyrra
- Arðsemi eigin fjár var jákvæð um 7,0% en var neikvæð um 2,7% á sama tímabili 2019
- Samsett hlutfall var 94,5% samanborið við 99,7% á sama tímabili 2019 Helgi Bjarnason, forstjóri VÍS:
„Árangur í fjárfestingum var góður á þriðja ársfjórðungi þrátt fyrir áskoranir á eignamörkuðum vegna heimsfaraldursins. Fjárfestingatekjur námu 1.110 m.kr. og nafnávöxtun var 2,9%. Afkomu af fjárfestingum má einkum rekja til ávöxtunar af skráðum hlutabréfum en hækkun skráðra hlutabréfa nam 7,2%. Einnig var afkoma af erlendum skuldabréfasjóðum góð í ársfjórðungnum. Viðsnúningur var í vátryggingarekstri milli fjórðunga. Afkoma vátryggingarekstrarins í þriðja ársfjórðungi var jákvæð um 358 milljónir króna ─ samanborið við tap upp á 158 milljónir króna í öðrum ársfjórðungi 2020. Iðgjöld tímabilsins voru 5.735 milljónir króna samanborið við 6.085 milljónir króna á sama tímabili í fyrra. Helstu ástæður fyrir lækkun iðgjalda er samdráttur í ferðaþjónustu og minni umsvif í erlendri endurtryggingastarfsemi. Samsett hlutfall fjórðungsins var 94,5%. Stafrænir sigrar
Við unnum ýmsa stafræna sigra á ársfjórðungnum. Við settum nýja heimasíðu í loftið en þar var allt kapp lagt á að útskýra tryggingar á mannamáli og veita góð ráð um forvarnir ─ sem stuðla að því að viðskiptavinir okkar lendi sjaldnar í tjónum. Þrátt fyrir að lítið sé um ferðalög í heimsfaraldrinum, þá höfum haldið áfram að þróa stafrænar lausnir í ferðatjónum. Afgreiðsla ferðatjóna er nú orðin sjálfvirk sem þýðir einfaldlega betri og hraðari þjónusta. Ef viðskiptavinir okkar verða fyrir skakkaföllum á ferðalögum erlendis, þá býður lausnin upp á sjálfvirka úrlausn mála. Við erum því tilbúin að veita enn betri þjónustu um leið og landinn fer að ferðast á ný. Við lokuðum þjónustuskrifstofunum aftur í þessari bylgju heimsfaraldursins og veittum þjónustu með öðrum leiðum. Þess má geta að stærsta þjónustuskrifstofan okkar er á netinu og er opin allan sólarhringinn. Hlutfall rafrænna tjónstilkynninga hefur aldrei verið hærra eða tæplega 60%. Rúmlega 90% af tilkynningum um tjón á innbúi eru nú tilkynnt rafrænt ─ og er rúmlega helmingur af þeim í sjálfvirkri afgreiðslu. Við erum stolt af því, enda erum við á stafrænni vegferð. Jákvætt viðhorf gagnvart Ökuvísi
Samvinnan við viðskiptavini okkar um þróun á Ökuvísi hefur verið mjög lærdómsrík. Þetta er ný nálgun í tryggingum hér á landi og er mikilvægt að rödd viðskiptavina heyrist frá byrjun. Við höfum því fengið viðskiptavini að borðinu til þess að hjálpa okkur að þróa og móta Ökuvísi. Þessi endurgjöf skiptir miklu máli, því við ætlum okkur að bjóða upp á vöru og þjónustu sem mætir raunverulegri þörf viðskiptavina okkar. Verkefninu miðar vel áfram en einn af þeim þáttum sem við hugum sérstaklega vel að ─ er að við séum ávallt að vinna í samræmi við persónuverndarlög. Gert er ráð fyrir fyrstu útgáfu nýs apps fyrir lok þessa árs. Þess má einnig geta að Íslendingar eru almennt jákvæðir gagnvart Ökuvísi, samkvæmt nýrri könnun. Þessi niðurstaða gefur okkur byr undir báða vængi ─ og hvetur okkur áfram.
Við lítum svo á að þessir stafrænu sigrar séu mikilvægar vörður í að verða stafrænt þjónustufyrirtæki. Við erum með skýra sýn og skýr markmið. Þrátt fyrir óvissu í samfélaginu vegna heimsfaraldursins höldum við ótrauð áfram ─ og lítum bjartsýn til framtíðar.“ Horfur
Uppfærð afkomuspá gerir ráð fyrir því að samsett hlutfall fyrir árið 2020 verði 105,5%, ávöxtun fjáreigna verði 8,2% og hagnaður fyrir skatta 390 milljónir. Afkomuspá til næstu 12 mánaða gerir ráð fyrir 96,8% samsettu hlutfalli, 5,6% ávöxtun fjáreigna og hagnaði fyrir skatta upp á rúmlega 2,3 milljarða. Kynningarfundur
Kynningarfundurinn vegna uppgjörsins fyrir markaðsaðila og fjárfesta verður eingöngu rafrænn. Fundurinn verður haldinn föstudaginn 23. október, klukkan 8:30. Helgi Bjarnason, forstjóri félagsins, mun kynna uppgjörið og svara spurningum. Fundurinn verður í beinni útsendingu með fjarfundarbúnaði Cisco Webex. Hægt er að tengjast fundinum með vafra eða hlaða niður hugbúnaði frá Cisco. Nánari leiðbeiningar um hvernig eigi að tengjast fundinum má finna á vefslóðinni: https://www.vis.is/3-arsfjordungur-2020/ Hægt er að tengja sig inn á fjarfundinn hér: https://www.vis.is/fjarfestafundir/ Einnig verður hægt að nálgast upptöku af fundinum á sömu vefslóð. Kynningarefni fundarins verður hægt að nálgast hér: https://www.vis.is/fjarfestaupplysingar/ Fjárhagsdagatal
Ársuppgjör 2020 || 25. febrúar 2021
Aðalfundur 2021 || 19. mars 2021 Nánari upplýsingar
Nánari upplýsingar veitir Erla Tryggvadóttir, samskiptastjóri VÍS, í síma 660-5260 eða með netfanginu erlat@vis.is
|