Islandsbanki hf.: Niðurstöður aðalfundar Íslandsbanka 2019Aðalfundur Íslandsbanka var haldinn í dag, fimmtudaginn 21. mars kl 15:00 í höfuðstöðvum bankans að Hagasmára 3, 201 Kópavogi. Friðrik Sophusson, formaður stjórnar, flutti skýrslu stjórnar og Birna Einarsdóttir, bankastjóri, fór yfir uppgjör bankans og helstu þætti í starfsemi hans á árinu 2018. Þung skattbyrði skekkir samkeppnistöðu íslenskra banka Í ávarpi sínu vísaði Friðrik til nýlegrar hvítbókar um framtíðarsýn fyrir fjármálakerfið sem undirstrikaði hve miklar umbætur hafi átt sér stað í íslensku bankakerfi á undanförnum árum. Hvítbókin, að sögn Friðriks, staðfesti ennfremur þunga skattbyrði íslensks bankakerfis sem hafi fyrst og fremst bitnað á íslenskum neytendum og skekkt samkeppnistöðu íslenskra banka sem etja m.a. kappi við erlenda banka, lífeyrissjóði og nýja aðila á fjármálamarkaði í formi fjártæknifyrirtækja. Þetta sé sérstaklega bagalegt í ljósi þess að ríkið eigi Íslandsbanka að fullu og nær allt hlutafé í Landsbankanum. En eignarhlutur íslenska ríkisins í íslenska fjármálakerfinu er margfalt meiri en tíðkast víðast hvar í Evrópu. Í hvítbókinni er fjallað um kosti þess að selja Íslandsbanka og ljóst að til mikils væri að vinna fyrir íslenska skattgreiðendur að slík sala fari vel fram. Jafnframt væri erlent eignarhald eða skráning á erlendan og innlendan markað æskileg. Það sé hinsvegar í höndum eigandans, íslenska ríkisins, að ákveða slíkt og afar mikilvægt að söluferlið verði sanngjarnt og gagnsætt. Friðrik bar upp tillögur til aðalfundar, sem m.a. fólu í sér greiðslu arðs að fjárhæð 5,3 milljörðum króna sem er í takt við arðgreiðslustefnu bankans, breytingu á starfskjarastefnu, samþykktum og stjórn bankans. Að lokum þakkaði Friðrik Helgu Valfells fyrir gott samstarf í stjórn, óskaði henni velfarnaðar og jafnframt bauð Tómas Má Sigurðsson velkominn í hennar stað. Stafræn þróun í forgangi hjá bankanum á árinu Birna Einarsdóttir, bankastjóri lýsti yfir ánægju með afkomu bankans á árinu 2018 sem skilaði hagnaði upp á 10,6 milljarða króna. Góður gangur hafi verið hjá móðurfélaginu og Íslandssjóðum þar sem þóknanatekjur hafi aukist um 6% á milli ára. Auk þess hafi bankinn stutt dyggilega við vöxt í hagkerfinu með útlánaaukningu upp á 12% á árinu. Birna sagði fjárfestingu í grunnstoðum bankans hafa náð hámarki á árinu þegar innleiðingu lauk á nýju grunnkerfi fyrir greiðslumiðlun og innlán sem sé stærsta tækniverkefni bankans frá upphafi. Bankinn sé farinn að njóta góðs af uppbyggingu fyrri ára og hefur nýtt tæknilag og samstarf við fjártæknifyrirtæki nýst afar vel við þróun á nýjum stafrænum lausnum fyrir viðskiptavini. Fjölmargar stafrænar nýjungar hafi verið kynntar á árinu sem hlotið hafi góðar viðtökur viðskiptavina en Íslandsbanki mældist efstur í Íslensku ánægjuvoginni hjá viðskiptavinum í bankaþjónustu, sjötta árið í röð. Birna greindi ennfremur frá því að frekari viðbóta í stafrænni þjónustu væri að vænta enda sé þessi starfsemi í algjörum forgangi hjá bankanum. Birna sagði stöðu bankans afar sterka og að farsæl fjármögnun á skuldabréfamörkuðum og hátt innlánahlutfall hafi skilað traustri lausafjárstöðu í bæði íslenskum krónum og erlendum gjaldmiðlum. Eiginfjárstaðan sé sömuleiðis sterk í alþjóðlegum samanburði auk þess sem áhætta bankans hafi haldist hófleg og vanskilahlutfall lágt. Að lokum tilkynnti Birna um mótun á nýrri stefnu fyrir bankann sem taki mið af breyttum bankaheimi og stöðu Íslandsbanka í samfélaginu sem muni skila sér í enn betri banka fyrir viðskiptavini hans. Niðurstöður aðalfundar Tillögur þær sem lágu fyrir fundinum má finna á heimasíðu félagsins: https://www.islandsbanki.is/is/frett/adalfundur-islandsbanka - Staðfesting ársreiknings fyrir árið 2018
Aðalfundur samþykkti endurskoðaða ársreikninga samstæðu félagsins vegna ársins 2018. - Skýrsla stjórnar um starfsemi bankans árið 2018
Friðrik Sophusson, stjórnarformaður Íslandsbanka flutti skýrslu stjórnar um starfsemi bankans árið 2018. - Staðfesting ársreiknings fyrir árið 2018
Birna Einarsdóttir, bankastjóri Íslandsbanka kynnti uppgjör bankans og helstu þætti starfsemi hans á árinu 2018 og var ársreikningur staðfestur. - Tillaga um greiðslu arðs og ráðstöfun hagnaðar bankans á árinu 2018
Samþykkt var að 5,3 milljarðar króna af hagnaði ársins 2018 yrðu greiddir í arð til hluthafa. Greiðslan samsvarar um 50% af hagnaði ársins 2018 og er í samræmi við langtímastefnu bankans um 40-50% arðgreiðsluhlutfall. Stjórn bankans má kalla til sérstaks hluthafafundar síðar á árinu þar sem tillaga um greiðslu arðs af hagnaði fyrri rekstrarára kann að vera lögð fram. - Kosning stjórnar- og varamanna
Í stjórn bankans voru endurkjörin: Anna Þórðardóttir, Auður Finnbogadóttir, Árni Stefánsson, Hallgrímur Snorrason, Heiðrún Jónsdóttir og Friðrik Sophusson, sem einnig var endurkjörinn formaður stjórnar. Tómas Már Sigurðsson var kjörinn nýr í stjórn í stað Helgu Valfells, sem óskaði ekki eftir endurkjöri. Herdís Gunnarsdóttir og Pálmi Kristinsson voru kjörin til áframhaldandi setu í varastjórn bankans. - Kosning endurskoðunarfélags
Samþykkt var að Ernst & Young yrði áfram endurskoðunarfélag bankans til næsta aðalfundar. - Tillaga um þóknun til stjórnar fyrir næsta kjörtímabil
Samþykkt var tillaga um laun stjórnarmanna og varamanna. - Tillaga um starfskjarastefnu
Samþykkt var breytt starfskjarastefna fyrir bankann. - Tillaga um breytingu á samþykktum bankans
Breytingartillaga á 8. grein samþykkta bankans var samþykkt og verður hún eftirleiðis svohljóðandi: „Hluthafafundi skal boða lengst fjórum vikum fyrir fund og skemmst viku fyrir fund, nema boða skal til aðalfundar með a.m.k. tveggja vikna fyrirvara. Stjórnarmenn, framkvæmdastjóra og endurskoðendur félagsins skal alltaf boða á hluthafafundi félagsins, svo og fulltrúa fjölmiðla á aðalfundi félagsins.” - Önnur mál
Engin önnur mál voru löglega borin upp á fundinum. Önnur gögn frá aðalfundi má finna á https://gamli.islandsbanki.is/adalfundur og á vef fjárfestatengsla Íslandsbanka, www.islandsbanki.is/fjarfestatengsl Hægt er að nálgast skýrslur Íslandsbanka fyrir árið 2018 á vef bankans, https://www.islandsbanki.is/is/flokkur/bankinn/arsskyrsla-islandsbanka-2018 Nánari upplýsingar veita
Fjárfestatengsl – Gunnar Magnússon, gunnarsm@islandsbanki.is sími 440 4665 Samskiptastjóri - Edda Hermannsdóttir, edda.hermannsdottir@islandsbanki.is sími 440 4005 Póstlisti Íslandsbanka
Ef þú vilt gerast áskrifandi að kauphallarfréttum Íslandsbanka þá vinsamlegast skráðu þig hér: https://www.islandsbanki.is/um-islandsbanka/fjarfestatengsl/hafdu-samband/postlisti/ Um Íslandsbanka
Íslandsbanki er leiðandi fjármálafyrirtæki á Íslandi með heildareignir sem nema 1.130 ma. kr. og með 25-50% markaðshlutdeild á innanlandsmarkaði. Saga Íslandsbanka spannar 140 ár af þjónustu við lykilatvinnuvegi þjóðarinnar en á þessum tíma hefur bankinn byggt upp sérþekkingu á sviði ferðaþjónustu, sjávarútvegs og orku. Framtíðarsýn Íslandsbanka er að vera #1 í þjónustu og vinna þrjú viðskiptasvið þétt saman til að tryggja góð sambönd við viðskiptavini bankans. Til að koma enn betur til móts við þarfir viðskiptavina, þá hefur Íslandsbanki þróað margvíslegar nýjar stafrænar lausnir s.s. öpp fyrir bankaþjónustu og Kass. Á sama tíma rekur bankinn skilvirkasta útibúanetið með 14 útibú staðsett á lykilstöðum um land allt. Sjötta árið í röð mældist Íslandsbanki efstur í Íslensku ánægjuvoginni hjá viðskiptavinum í bankaþjónustu og þá var bankinn einnig útnefndur besti bankinn á Íslandi árið 2018 af Euromoney. Íslandsbanki hefur BBB+/A-2 lánshæfismat frá S&P Global Ratings. www.islandsbanki.is Fyrirvari
Framangreind fréttatilkynning gæti vísað til spár um framtíðarhorfur sem er háð áhættu- og óvissuþáttum og getur þýtt að raunverulegur árangur verði umtalsvert frábrugðinn því sem spáð er í þessari fréttatilkynningu. Íslandsbanki hf. hefur ekki skyldu til að, og mun ekki, uppfæra þessar spár um framtíðarhorfur félagsins til að endurspegla atburði og aðstæður sem eiga sér stað eftir útgáfu þessarar fréttatilkynningar. Það er ábyrgð fjárfestis að reiða sig ekki seinna meir á spár um framtíðarhorfur sem eru settar fram í þessari fréttatilkynningu þar sem þær eiga eingöngu við á þeim tíma sem hún er gefin út. Spár um framtíðarhorfur gefa ekki áreiðanlega vísbendingu um framtíðarárangur og eru allar yfirlýsingar um framtíðarhorfur félagsins fullgildar í heild sinni með tilliti til þessa fyrirvara.
|