Byggðastofnun
Reikningsskil

Byggðastofnun - Ársreikningur 2016

Ársreikningur Byggðastofnunar 2016

Ársreikningur Byggðastofnunar fyrir árið 2016, var staðfestur af stjórn stofnunarinnar 31. mars 2017.

Hagnaður ársins nam 157,1 milljónum króna.  Eiginfjárhlutfall í lok júní skv. eiginfjárákvæðum laga nr. 161/2002 um fjármálafyrirtæki var 22,74% en var 21,56% í lok árs 2015.

Um stofnunina gilda lög um Byggðastofnun nr. 106/1999 og reglugerð nr. 347/2000. Hlutverk Byggðastofnunar er að efla byggð og atvinnulíf með sérstakri áherslu á jöfnun tækifæra allra landsmanna til atvinnu og búsetu. Í samræmi við hlutverk sitt undirbýr, skipuleggur og fjármagnar stofnunin verkefni og veitir lán með það að markmiði að treysta byggð, efla atvinnu og stuðla að nýsköpun í atvinnulífi. Fjármögnun verkefna skal eftir föngum vera í samstarfi við aðra. Stofnunin skipuleggur og vinnur að atvinnuráðgjöf í samstarfi við atvinnuþróunarfélög, sveitarfélög og aðra haghafa.  Byggðastofnun fylgist með þróun byggðar í landinu, m.a. með gagnasöfnun og rannsóknum. Stofnunin getur gert eða látið gera áætlanir um þróun byggðar og atvinnulífs í þeim tilgangi að treysta búsetu og atvinnu í byggðum landsins.

Helstu niðurstöður úr ársreikningi Byggðastofnunar 2016

·        Hagnaður ársins nam 157 milljónum króna.

·        Eiginfjárhlutfall skv. lögum um fjármálafyrirtæki var 22,74% en skal að lágmarki vera 8%

·        Hreinar vaxtatekjur voru 454,8 milljónir króna eða 53,4% af vaxtatekjum, samanborið við 454,8 milljónir króna (54,3% af vaxtatekjum) hreinar vaxtatekjur árið 2015.

·        Laun og annar rekstrarkostnaður nam 428,2 milljónum króna samanborið við 392,6 milljónir árið 2015.

·        Eignir námu 14.140 milljónum króna og hafa lækkað um 276,6 milljónir frá árslokum 2015.  Þar af voru útlán og fullnustueignir 10.125 milljónir.

·        Skuldir námu 11.233 milljónum króna og lækkuðu um 433,7 milljónir á árinu.

Um ársreikninginn

Hagnaður ársins nam 157,1 milljón króna.  Skýrist hagnaður tímabilsins fyrst og fremst á lægri framlögum á afskriftarreikning útlána og matsbreytingu hlutabréfa. 

Eiginfjárhlutfall Byggðastofnunar var 22,74% í lok tímabilsins.

Horfur

Eiginfjárstaða stofnunarinnar er áfarm sterk og gefur henni færi á að vera öflugur bakhjarl fyrirtækja á landsbyggðinni.

Fjármálaeftirlitið hefur heimild, samkvæmt 1. og 2. mgr. 84. gr. d laga nr. 161/2002 um fjármálafyrirtæki, til að kveða á um sveiflujöfnunarauka sem er 0-2,5% af áhættugrunni. Í 1. mgr. 84. gr. e, sömu laga er kveðið á um 2,5% verndunarauka. Samkvæmt bréfi frá Fjármálaeftirlitinu, dagsettu 1. nóvember 2016, er kveðið á um 1% verndunarauka frá dagsetningu bréfsins. Verndunaraukinn hækkar í 1,75% þann 1. janúar 2017 og við bætist 1% sveiflujöfnunarauki 1. mars 2017. Samkvæmt yfirliti frá Fjármálaeftirlitinu verður samanlögð krafa um eiginfjárauka 3,75% þann 1. janúar 2018.

Eins og að ofan greinir er eiginfjárstaða Byggðastofnunar sterk og því mun hún geta uppfyllt þessa eiginfjárkröfu.

Nánari upplýsingar

Nánari upplýsingar veitir Aðalsteinn Þorsteinsson, forstjóri Byggðastofnunar í síma 455 5400 eða á netfanginu adalsteinn@byggdastofnun.is

Lykiltölur úr ársreikningi og samanburður við fyrri ár