Hlutafjáraukning hjá Eik fasteignafélagi hf.
Þann 17. janúar 2014 samþykkti hluthafafundur Eikar fasteignafélags hf. að veita stjórn félagsins tvískipta heimild til að hækka hlutafé þess í tengslum við kaup á EF1 hf. (ákveðnar eignir SMI ehf.) og Landfestum ehf. Á grundvelli heimildar í 4. gr. samþykkta Eikar fasteignafélags hf. leggur stjórn félagsins til að gefa út nýja hluti í félaginu sem afhentir verða Arion banka hf. sem greiðsla fyrir allt hlutafé Landfesta ehf. Í skýrslu stjórnar, vegna hlutafjáraukningarinnar, kemur meðal annars fram að félagið hafi fest kaup á öllu hlutafé EF1 hf. fyrir um 4 m.kr., en heildareignir og skuldir þess félags námu um 15 ma.kr. EF1 hf. hefur síðan þá greitt upp lán að fjárhæð 185 m.kr. og Eik fasteignafélag hf. gengist í ábyrgð fyrir lánum félagsins.
Eftir ofangreinda hlutafjáraukningu mun hlutafé Eikar fasteignafélags hf. nema 2.904.432.771 kr., en heildarvirði nýrra hluta sem afhentir verða Arion banka nemur 6,8 ma.kr. samkvæmt kaupsamningi. Á næstu misserum er gert ráð fyrir að Eik muni auka eigið fé sitt um 3 milljarða með útgáfu nýrra hluta, þar sem forgangsréttur hluthafa einskorðast við þá hluthafa sem áttu hlutafé í félaginu þegar sú aukning var samþykkt á hluthafafundi félagsins í janúar 2014.
Frekari upplýsingar veitir
Garðar Hannes Friðjónsson,
forstjóri Eikar fasteignafélags hf.
Sími: 861-3027
Netfang: gardar@eik.is
|