Lok máls nr. 971/2011 fyrir Héraðsdómi Reykjaness, Þorsteinn Hjaltested gegn Kópavogsbæ
Eins og tilkynnt var til Nasdaq OMX Ísland hinn 13. maí 2011 höfðaði Þorsteinn Hjaltested þann sama dag mál á hendur Kópavogsbæ með dómkröfu að fjárhæð kr. 6.943.754.752,- að viðbættum vöxtum. Málið var rekið fyrir Héraðsdómi Reykjaness og hlaut málsnúmerið E-971/2011. Ágreiningsefni málsins átti rætur sínar að rekja til deilu aðila um uppgjör bóta samkvæmt sátt á grundvelli eignarnáms sem fram fór á árinu 2007.
Með úrskurði Héraðsdóms Reykjaness hinn 17. janúar sl. var málinu vísað frá dómi. Frestur til að kæra úrskurðinn til Hæstaréttar rann út föstudaginn 31. janúar sl. Hefur Kópavogsbær nú fengið staðfest að Þorsteinn Hjaltested kærði ekki úrskurð Héraðsdóms Reykjaness til Hæstaréttar. Dómsmálinu er því lokið.
Ekki liggur fyrir hvort Þorsteinn Hjaltested muni höfða nýtt mál á hendur Kópavogsbæ vegna þess ágreinings sem uppi er milli aðila.
|