Cosmos Trawl, fyrirtæki í 100% eigu Hampiðjunnar, kaupir 80% hlut í rekstri og eignum Nordsötrawl í Thyborön, Danmörku
Cosmos Trawl A/S í Hirtshals, Danmörku hefur keypt 80% hlut í rekstri og eignum netaverkstæðisins Nordsötrawl sem er starfrækt í Thyborön í Danmörku. Kaupverðið, sem er að fullu greitt, var DKK 13 milljónir.
Jón Guðmann Pétursson, forstjóri Hampiðjunnar:
Cosmos er stærsta netaverkstæði Danmerkur með starfsstöðvar í Hirtshals og Skagen. Norsötrawl í Thyborön er næst stærsta netaverkstæði Danmerkur en Thyborön hefur verið vaxandi fiskihöfn á umliðnum árum og er ein af megin fiskihöfnum Danmerkur. Með netaverkstæði í Hirtshals, Skagen og nú í Thyborön er staða Cosmos sterk á danska veiðarfæramarkaðnum.
Þá erum við afar ánægð að fá Flemming Ruby, eiganda og stofnanda Nordsötrawl, í lið með okkur. Hann hefur verið frumkvöðull í þróun veiðarfæra fyrir fjöltrollaveiðar þar sem skip dregur allt upp í tólf botntroll í einu. Flemming mun eiga 20% í félaginu og reka það áfram af sama myndarskap hér eftir sem hingað til.
|