Afkoma HB Granda hf. á fyrri árshelmingi 2012
-
Rekstrartekjur samstæðunnar á fyrri árshelmingi ársins 2012 voru 93,3 m€, en voru 76,3 m€ árið áður
-
EBITDA var 28,7 m€ (30,8%), en var 25,2 m€ (33,1%) árið áður
-
Tap tímabilsins var 1,5 m€, þar af er gjaldfærsla vegna virðisrýrnunar aflaheimilda 21,6 m€. Árið áður var hagnaður 15,7 m€
Sjá lykiltölur í viðhengi
Rekstur fyrstu sex mánaða ársins 2012
Rekstrartekjur HB Granda hf. á fyrri helmingi ársins 2012 námu 93,3 m€, samanborið við 76,3 m€ árið áður. Rekstrarhagnaður fyrir afskriftir (EBITDA) var 28,7 m€ eða 30,8% af rekstrartekjum, en var 25,2 m€ eða 33,1% árið áður. Hærri rekstrarhagnaður skýrist fyrst og fremst af góðri afkomu loðnuvertíðar. Áhrif fjáreignatekna og fjármagnsgjalda voru neikvæð um 2,0 m€, en um 4,2 m€ á sama tíma árið áður. Áhrif hlutdeildarfélaga voru jákvæð um 1,3 m€. Hagnaður fyrir tekjuskatt var 1,0 m€ og tap tímabilsins var 1,5 m€. Tekjuskattur að fjárhæð 2,5 m€ er reiknaður samkvæmt framtali í íslenskum krónum.
Laun og launatengd gjöld námu samtals 29,0 m€ (4,7 milljarðar króna), en 28,3 m€ (4,6 milljarður króna) á sama tíma árið áður.
Alþingi samþykkti í lok júní 2012 ný lög um veiðigjöld sem fela í sér að veiðigjöld HB Granda hf. rúmlega fjórfaldast frá síðasta fiskveiðiári. Miðað við forsendur laganna nema áætluð veiðigjöld til greiðslu vegna fiskveiðiársins 2012/2013 12.686 þús. evrum (2,0 milljarðar króna). Eftir það er gert ráð fyrir stighækkandi sérstöku veiðigjaldi þar til veiðigjöldin á fiskveiðiárinu 2016/2017 ná 65% af sérstaklega reiknaðri rentu allra sjávarútvegsfyrirtækja samanlagt byggt á almanaksárinu 2014. Veruleg hækkun á veiðigjöldum félagsins lækkar rekstrarvirði þess.
Virðisrýrnunarpróf var framkvæmt á aflaheimildum í lok júní 2012 með því að reikna endurheimtanlegt virði þeirra. Niðurstaða virðisrýrnunarprófs sýnir að rekstrarvirði félagsins lækkar um 136.468 þús. evrur (22,3 milljarðar króna) eða úr 397.369 þús. evrum í 260.897 þús. evrur á fyrri hluta ársins 2012 sem skýrist af hækkun á veiðigjaldi. Í árslok 2011 var reiknað virði eigna félagsins talsvert umfram bókfært verð þeirra eða sem nemur 143.163 þús. evrum.
Eingöngu keyptar aflaheimildir félagsins eru færðar til eignar. Bókfærðar aflaheimildir í uppsjávarfiski hafa ekki rýrnað í virði, en bókfærðar aflaheimildir botnfisks hafa orðið fyrir 21.601 þús. evru (3,5 milljarða króna) virðisrýrnun.
Efnahagur
Heildareignir félagsins námu 296,8 m€ í lok júní 2012. Þar af voru fastafjármunir 240,4 m€ og veltufjármunir 56,3 m€. Eigið fé nam 171,0 m€ og var eiginfjárhlutfall 57,6%, en var 54,4% í lok árs 2011. Heildarskuldir félagsins voru í júnílok 125,8 m€.
Sjóðstreymi
Handbært fé frá rekstri nam 23,3 m€ á fyrri helmingi ársins 2012, en 10,8 m€ á sama tíma fyrra árs. Nettó fjárfesting í rekstrarfjármunum nam 10,0 m€. Fjármögnunarhreyfingar námu 28,1 m€ og voru nettó afborganir langtímalána þar af 29,8 m€. Handbært fé lækkaði því um 14,8 m€ og var í lok júní 6,4 m€.
Meginniðurstöður færðar til íslenskra króna
Séu niðurstöður rekstrarreiknings reiknaðar til íslenskra króna á meðalgengi fyrri helmings ársins 2012 (1 evra = 163,1 kr) verða tekjur 15,2 milljarðar króna, EBITDA 4,7 milljarður og tap 0,2 milljarðar. Séu niðurstöður efnahagsreiknings reiknaðar til íslenskra króna á gengi 30. júní 2012 (1 evra = 158,2 kr) verða eignir samtals 46,9 milljarðar króna, skuldir 19,9 milljarðar og eigið fé 27,0 milljarðar.
Skipastóll og afli
Skipastóll HB Granda hf. var óbreyttur.
Á fyrri helmingi ársins 2012 var afli skipa félagsins 23 þúsund tonn af botnfiski og 104 þúsund tonn af uppsjávarfiski.
Annað
Fjármálastjóri félagsins hefur verið skipaður framkvæmdastjóri tímabundið.
|