Eik fasteignafélag hf.: Árshlutauppgjör fyrstu þrjá mánuði ársins 2021- Rekstrartekjur námu 2.033 m.kr.
- Virðisrýrnun viðskiptakrafna nam 89 m.kr.
- Rekstrarhagnaður fyrir matsbreytingu og afskriftir nam 1.260 m.kr.
- Heildarhagnaður nam 884 m.kr.
- Handbært fé frá rekstri nam 745 m.kr.
- Bókfært virði fjárfestingareigna nam 99.711 m.kr.
- Bókfært virði eigna til eigin nota nam 3.835 m.kr. í lok tímabilsins.
- Matsbreyting fjárfestingareigna var 881 m.kr.
- Handbært fé nam 2.904 m.kr.
- Vaxtaberandi skuldir námu 63.103 m.kr. í lok tímabilsins.
- Eiginfjárhlutfall nam 31,4%.
- Hagnaður á hlut var 0,26 kr.
- Virðisútleiguhlutfall var 92% í lok tímabilsins
- Vegnir verðtryggðir vextir námu 3,09% í lok tímabilsins.
- Vegnir óverðtryggðir vextir námu 3,15% í lok tímabilsins.
Árshlutareikningur Eikar fasteignafélags hf. fyrir tímabilið 1. janúar til 31. mars 2021 var samþykktur af stjórn og forstjóra félagsins þann 29. apríl 2021. Meðfylgjandi er árshlutaskýrsla sem inniheldur árshlutareikning vegna fyrstu þriggja mánaða ársins ásamt ítarlegri upplýsingum um rekstur félagsins en fram koma í tilkynningunni. Rekstur félagsins Rekstur félagsins gekk vel á fyrstu þremur mánuðum ársins 2021 og var afkoman í takt við áætlanir stjórnenda félagsins. Rekstrartekjur félagsins á fyrstu þremur mánuðum ársins 2021 námu 2.033 m.kr. Þar af voru leigutekjur 1.873 m.kr. Rekstrarhagnaður fyrir matsbreytingu og afskriftir nam 1.260 m.kr. Hagnaður fyrir tekjuskatt nam 1.107 m.kr. og heildarhagnaður samstæðunnar á fyrstu þremur mánuðum ársins 2021 nam 884 m.kr. NOI hlutfall (þ.e. rekstrarhagnaður fyrir matsbreytingu og afskriftir sem hlutfall af leigutekjum) nam 67,8% á fyrstu þremur mánuðum ársins 2021 samanborið við 71,4% fyrir sama tímabil 2020. Fjárfestingareignir félagsins eru metnar á gangvirði í samræmi við alþjóðlega reikningsskilastaðla (IFRS) og stuðst er m.a. við núvirt framtíðarsjóðstreymi einstakra eigna. Breytingar á gangvirði eru færðar undir matsbreytingu fjárfestingareigna sem voru um 881 m.kr. á fyrstu þremur mánuðum ársins. Efnahagur félagsins Heildareignir félagsins námu 108.441 m.kr. þann 31. mars 2021. Þar af eru fjárfestingareignir að virði 99.711 m.kr. sem skiptast í fjárfestingareignir í útleigu að fjárhæð 96.873 m.kr., leigueignir 2.293 m.kr., fjárfestingareignir í þróun 76 m.kr., byggingarréttir og lóðir 457 m.kr. og fyrirframgreidd gatnagerðargjöld að fjárhæð 13 m.kr. Eignir til eigin nota námu 3.835 m.kr. og fasteignir í þróun 659 m.kr. Eigið fé félagsins nam 34.084 m.kr. í lok mars 2021 og var eiginfjárhlutfall 31,4%. Heildarskuldir félagsins námu 74.358 m.kr. þann 31. mars 2021, þar af voru vaxtaberandi skuldir 63.103 m.kr. og tekjuskattsskuldbinding 7.668 m.kr. Virðisútleiguhlutfall Virðisútleiguhlutfall félagsins stóð í stað frá áramótum og var 92% í lok fyrsta ársfjórðungs. Horfur og áhrif vegna COVID-19 Horfur fyrir árið eru óbreyttar frá rekstraráætlun sem birt var í febrúar síðastliðnum. Áhrif COVID-19 á rekstur félagsins er enn sýnileg og áætlar félagið að bein áhrif COVID-19 hafi verið á bilinu 130-140 m.kr. á fyrstu þremur mánuðum ársins. Félagið gerir ráð fyrir að faraldurinn muni halda áfram að hafa áhrif á reksturinn út árið. Fjármögnun Félagið gaf út tvo nýja skuldabréfaflokka í fjórðungnum. Seldar voru 2.200 m.kr. að nafnverði í skuldabréfaflokknum EIK 100327 sem ber 1,45% verðtryggða vexti. Þá voru seldar 1.200 m.kr. að nafnverði í skuldabréfaflokknum EIK 23 1 sem ber 2,9% óverðtryggða vexti. Fjármunirnir voru nýttir í að greiða upp óhagstæðari bankalán. Skuldabréfaflokkurinn EIK 15 1, sem bar 3,3% vexti, var greiddur upp í mars síðastliðnum. Uppgreiðslan var fjármögnuð að fullu með óverðtryggðu bankaláni. Vegnir verðtryggðir vextir námu 3,09% í lok fjórðungsins og vegnir óverðtryggðir vextir 3,15%, en félagið leitast alltaf eftir því að hafa sem hagstæðust fjármagnskjör. Eignasafn félagsins Fasteignir innan samstæðunnar eru rúmlega 100 talsins og telja rúmlega 310 þúsund útleigufermetra í rúmlega 600 leigueiningum. Heildarfjöldi leigutaka er yfir 400. Helstu fasteignir félagsins á höfuðborgarsvæðinu eru Borgartún 21 og 21a, Borgartún 26, Suðurlandsbraut 8 og 10, Mýrargata 2-16, Pósthússtræti 2 (Hótel 1919), Smáratorg 3 (Turninn), Smáratorg 1, Álfheimar 74 (Nýi Glæsibær), Grjótháls 1-3 og Austurstræti 5, 6, 7 og 17. Helsta fasteign félagsins utan höfuðborgarsvæðisins er Glerártorg. Stærstu leigutakar félagsins eru Húsasmiðjan, Flugleiðahótel, Ríkiseignir, Rúmfatalagerinn, Sýn, Landsbankinn, Össur, Míla, Síminn og Deloitte. Stærsti hluti fasteignasafns Eikar er skrifstofuhúsnæði eða 45%. Næst koma verslunarhúsnæði 24%, lagerhúsnæði 13%, hótel 9%, heilsutengt húsnæði 5% og veitinga- og skemmtistaðir 3%. Um 92% fasteigna félagsins eru á höfuðborgarsvæðinu, þar af 38% á fjármála- og viðskiptasvæði Reykjavíkur (aðallega innan póstnúmera 105 og 108), 17% í miðbæ Reykjavíkur og 19% í Smáranum - Mjódd. 8% eignasafnsins er á landsbyggðinni, þar af tæplega 7% á Akureyri. Rafrænn kynningarfundur
Rafrænn kynningarfundur verður haldinn föstudaginn 30. apríl 2021 klukkan 8:30. Garðar Hannes Friðjónsson, forstjóri og Lýður H. Gunnarsson, framkvæmdastjóri fjármálasviðs, munu kynna uppgjörið og svara spurningum að lokinni kynningu. Skráning á fundinn fer fram hér: https://us02web.zoom.us/webinar/register/WN_6Ug4VeuVS_G5bHZB-_1rcg Eftir skráningu fá þátttakendur tölvupóst með nánari upplýsingum. Fjárhagsdagatal 2021 Stefnt er að birtingu árshluta- og ársuppgjöra á neðangreindum dagsetningum: Árshlutauppgjör 2. ársfjórðungs 2021 25. ágúst 2021
Árshlutauppgjör 3. ársfjórðungs 2021 28. október 2021
Stjórnendauppgjör 2021 og áætlun 2022 11. febrúar 2022
Ársuppgjör 2021 3. mars 2022 Nánari upplýsingar veitir: Garðar Hannes Friðjónsson, forstjóri, gardar@eik.is, s. 590-2200
Lýður H. Gunnarsson, framkvæmdastjóri fjármálasviðs, lydur@eik.is, s. 820-8980
|